राज्यातील सुपर मार्केट आणि दुकानांमध्ये वाइन विक्रीचे प्रकरण सध्या लटकले आहे. सुपरमार्केटमध्ये वाईन विक्रीला परवानगी देण्याचा कोणताही निर्णय सरकारने घेतलेला नाही, असे स्पष्टीकरण राज्याचे उत्पादन शुल्क मंत्री शंभूराज देसाई यांनी दिले आहे. याबाबत सविस्तर अभ्यास करून राज्य सरकार निर्णय घेईल.
दरम्यान राज्यातील मागील महाविकास आघाडी सरकारने सुपर मार्केट आणि दुकानांमध्ये वाइन विक्रीला परवानगी देण्याचा निर्णय घेतला होता. त्यामागे तत्कालीन ठाकरे सरकारने सुपर मार्केट आणि दुकानांमध्ये वाईनची विक्री केल्यास शेतकऱ्यांना फायदा होईल, त्यांचे उत्पन्न वाढेल, असे सांगितले होते. त्यावेळी भाजपने कडाडून विरोध केला. भाजपसह अन्य पक्षांच्या विरोधामुळे हा निर्णय पुढे ढकलण्यात आला. आघाडी सरकार महाराष्ट्राला मद्य राष्ट्र बनवण्याच्या नादात आहे, हे खपवून घेतले जाणार नाही, असे तत्कालीन विरोधी पक्षनेते देवेंद्र फडणवीस यांनी म्हटले होते.
गुरुवारी प्रसारमाध्यमांशी बोलताना उत्पादन शुल्क मंत्री शंभूराज देसाई म्हणाले होते की, सुपर मार्केट आणि दुकानांमध्ये वाईन विक्री करण्याचा निर्णय शेतकऱ्यांच्या हिताचा आहे, मात्र मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याशी चर्चा करून अंतिम निर्णय घेतला जाईल. सुपरमार्केट आणि दुकानांमध्ये दारू विक्रीबाबत उत्पादन शुल्क विभागाकडून सर्वेक्षण करण्यात आले. सर्वेक्षणात मोठ्या संख्येने लोकांनी सुपरमार्केटमध्ये वाईन विक्रीला पाठिंबा दिला आहे.
वाद वाढल्याने दिले स्पष्टीकरण
सुपरमार्केट आणि दुकानांमध्ये वाईन विक्रीच्या परवानगीचा वाद वाढल्यानंतर उत्पादन शुल्क मंत्री शंभूराज देसाई यांनी स्पष्टीकरण दिले. त्यांच्या वक्तव्याचा विपर्यास करण्यात आल्याचे ते म्हणाले. राज्य सरकार सुपरमार्केटमध्ये वाइन विक्रीच्या बाजूने आहे, तर दुकानांमध्ये वाइन विक्रीबाबत कोणताही निर्णय घेण्यात आलेला नाही, असे काही माध्यमांनी सांगितले. सध्या त्याचा अभ्यास सुरू आहे. अशा परिस्थितीत सुपरमार्केट आणि दुकानांमध्ये वाईन विकली जाईल असे म्हणणे पूर्णपणे चुकीचे आहे. असा कोणताही निर्णय आतापर्यंत झालेला नाही.
